TETUN

 TETUN    |    ENGLISH    |    PORTUGUESE    |    INDONESIAN

-------------------------------------------------------------------------------------

TIMOR OHIN

Husik Timor moris nonok!

Timór la'ós brinkedu atu halimar

Timór la'ós bola atu joga.

Timór ne'e ra'an-ruin uluk nian

Timór ne'e katuas-ferik, joven no labarik sira nian.

Ami katuas-ferik hakarak toba hakmatek

Ami joven hakarak horon no susu Timór nia isin,

Ami labarik sira hakarak livre hosi tortura oin-oin.

Ra'an ida, lisan ida, kultura ida

Timór ida de'it.

-Amb Juandi

Dili, 23.07.2017

  

LIAN HOSI BEIOAN BA AVÔ PAI

Jacinto Mau-Buti de Deus

Ha’u haree la hetan ona avo-nia isin,
Ha’u la senti ona avo-nia domin hanesan uluk.
 
Lakon, lakon, lakon ona 

lian be mamar no neneik.

Ho lian fraku, fanu ha’u iha dadeersan
‘hadeer, hadeer ona” tan kareta-bis hala’i ona – bá ona ba, maudia!
 

Molok ha’u sai-hosi uma-lulik laran,

avo bolu ha’u fila hu’u iis iha ó-liman rasik,
tula no baku mai ha’u kabás, avo hatete “sai ba, bá loos ona – labele hateke mai kotuk”
 
Iha dalan-klaran, hau matan-been monu,
Ida ne’e kala hau nia hasoru malu ikus ho avô.
 
Hosi do’ok, avô ko’alia ho ha’u
lian hakat liu foho lubuk to’o Ermera no Díli;

Avo husu lerek ai-moruk
“Apeu, ó al aimoruk ma au ein, ó pe al na kode…!!!

ó sosa ai-moruk ba atu ha’u bele tahan lerek moris
atu ha'u bele hamutuk ho imi” nafatin…
 
Ikus mai, husik hela ami nobun la’o tutur-liman ba ulun,

tanis hakuak malu iha avô-nia leten.

Tanis ne'e hanesan knananuk murak ida
ne’ebé espresa hosi ami-fuan laran.
 
Ami simu avô-nia naan no bua-malus 

ami hán no mama - ami-laran metin ba matak-malirin ne’e.

Ne'e despedida ikus ona ho ó-oan no beioan-ami,

 
Iha uma-lulik laran kal ahi la suar ona,
Iha uma-lulik laran kal toba-fatin mamuk ona.

Iha uma lulik laran kal ami toba mesak de’it,
Iha uma-lulik laran kal ami tanis mesak de’it.
 
Iha uma lulik ne'e nia laran,

ita-rua dada-li’a ho tempu ne’ebé limitadu tebes. 

avô hatete de’it; “ha’u sei tulun imi mak ne’e”

ha’u fiar avô-nia klamar 

hamutuk nafatin ho ha’u to’o ikus ha’u mós taka matan”

 
Avô….ehh…Avô…!!! AVÔ…
Ita beioan; Adom ho Avinha maski ladauk rei ita-liman

Ha'u fiar, liu-hosi foto ne’ebé avô haree ona
avô sei haraik matak malirin no isin badinas nafatin ba sira-rua. 
 

-Juandi
Comoro, 19/07/2022 – 01.00-02.11am

---

Note: Poema ne’e, hanesan espresaun tristeza ida ba avô pai Jacinto ‘Mau-Buti’ de Deus ne’ebé mate iha 31 Maiu 2022 no serimónia hakoi iha 02 Juñu 2022.

VOICE TO CORONA VIRUS 

Ó mai koko atu halakon ha’u-nia fiar,
ne’e la’e!

Ó la bo’ot liu ha’u-nia fiar,
Ó la bo’ot liu orasaun
“Ami Aman”
ne’ebé Na’i Jesus Kristu
hanorin ona mai ami.

Foho Tolu Timór nian
Foho Ramelau,
Foho Kablaki,
Foho Matebian,
Hanesan lale’an tolu
no foho sira seluk mós hanesan forsa 
atu satan, taka netik anin foer Corona.

Mota bo’ot sei lulik, la fó fatin ba ó atu hakur
Tasi sei lulik no siak lori korenti futu metin ó,
Udan sei bo’ot ho ra’i-lakan, fera no harahun ó
Bee-matan, mata moris sei tolan moris ó.

Lafaek sei halibur animál fuik tomak iha Timór
Sira sei si’ak, sei tata, sei oho ó.

Timór ra’i lulik, nain moris
Timór ra’i lulik, nain siak
Timór ra’i lulik, la fó fatin ba ó

Timór lulik hanesan tudik lulik
Sei sona borus ó!

-    Amb Juandi
Bairo-Pité, 28/03/2020-02.00am